mandag 5. mars 2018

Fantomsmerte



vekta av deg i armane mine
medan eg bar deg rundt
dei nettene du vakna - skrikande
ei uro som måtte finne svar
hos meg

vekta av deg i armane mine
dei dagane du sovna
medan eg heldt deg tett inntil
og det var berre du
i heile verda

vekta av deg når eg lyfta deg
opp frå vogga, opp frå golvet, opp på stellebordet
bleie av bleie på
og så lyfte deg ned att, ut
på ein ny ekspedisjon – bort frå meg

vekta av saknet i hjartet mitt
er ei fantomsmerte, tilsvarande stor
vekta av det tunge, sovande hovudet ditt
mot brystkassa mi


fredag 2. mars 2018

Eg var der, altså



eg var der
det er heilt sant
sjølv om du ikkje såg meg
og eg eigentleg ikkje såg deg

gøymt bak kameraskjermen
var det vel berre håret mitt
(det vesle som er att)
som viste og du kunne sjå
meg inn i linsa

for bildet som er forma i hovudet mitt
er filtrert gjennom fleire lag
slipte glas
og lagra først på ei minnebrikke
og deretter på pc

så eg var der, altså
det er nesten heilt sant –




torsdag 1. mars 2018

Krigens to ansikt

tobarnsfar (45) frå Norge
jobbar på våpenfabrikken,
meiner det er ei sikker
inntektskjelde, og
«hadde ikkje eg jobba her,
ville nokon andre gjort det»

tidlegare tobarnsfar (45) frå Jemen
slår ut med armane;
han er tom for ord
men auga fortel ei historie
om tusen knuste draumar –