Ei reise heim #5

Mitt landskap flyt

som ein flåte

på eit uendeleg hav

der ute er det kvilestader,

le for vind, le for regn

holmar og øyer som vinkar meg nære

og båten min flyt framover,

min skjøre farkost er i rute

eg kan unne meg eit smil

ved synet av desse mine vener

Ei reise heim #4

Somme dagar

har ein farge av lukke,

ein eim av ro og fred

tider som ikkje vil komme

ikkje vil gå

somme dagar

berre er eg her,

skvalpar i sjøen

med blikket mot ein horisont

som verkar klarare enn nokon gong

og trass i vissa

om stormar som kjem

villande tåke

og trugande sjøar,

kan eg kvile her

kan eg lytte til stilla

utan angst

Ei reise heim #3

Vegen bak ligg open,

eg ser kor eg kjem frå

kva som har hendt

kor eg har vore –

vegen framover

lokkar med sitt mystiske

skjær av noko uverkeleg,

eit slør eg må dra til side

dag for dag

Indian summer

(Weekend in black and white,  Haiku my heart)

Ei reise heim #2

Nokre dagar

fyk tida

andre dagar

står den stille

ein dag vil reisa ta slutt

og eg vil stige i land

på ei brygge

ingen endå har sett

Ei reise heim #1

Ingen veit

kor vegen ber av,

ingen veit

kva som møter

berre den som kan stige utanfor

båt og sjø, øyer og horisontar

og teikne linjer over jorda

med ein finger

(Torsdagstema)