torsdag 28. august 2014

Flekkar på eplet




vi er lurt inn i ein illusjon
alle som ein,
eit bedrag, ein svindel
utført av sorterarar
med pengar i blikket

dei som skruppellaust
legg sine blankpolerte
skinande eple i fruktdisken,
sprayar dei lett
og gliser oss velkomne i døra

for når eplehausten er her,
og vi kan hente dei verkelege varene…

har dei flekker og bulkar
dei er små og store
skinande og bleike;
heile spekteret er der
og epletreet er perfekt –

-

eg er sikker på
at nakne Adam
hadde sine føflekkar
og gule tenner

det var berre det;
who cares
og så flotte merker!

det er ei kjent sak
at prikkfritt
er det same som ingenting

og ingenting
er ikkje noko å trakte etter



#Sortering

Ok, sortering eller ikkje sortering av epler er ikkje ei sak eg eigentleg brenn for...  Menneske, derimot, dei brenn eg for. At alle skal få vere glade i den ein er.  At vi ikkje skal vere så innmari opptekne av jakta på det perfekte. At ingen skal sorterast bort -

onsdag 27. august 2014

Forandring



kor annleis alt vart
tenkjer konstruktøren
bøygd over sine teikningar,
tankefull
i møte med resultatet
av dei gode intensjonane, planane
som var så perfekte

kor annleis alt vart
då siste hand var lagt;
utsikta kunne nytast
gleda kunne delast –

og han såg kor saumen rakna,
kor søylene vakla
kor grunnmuren smuldra opp
under føtene

bøygd over teikningane
med tunge sukk, trøytte blikk
og eit fast hjarte;
her må det gjerast
noko
som kan rette opp alt
ein gong for alle –



tirsdag 26. august 2014

Det bakanfor


somme tider er gleda eit plaster
dekkjer det bakanfor
som eit skjold -

sender sine lysbølgjer
mot auga dine,
skapar illusjonar, draumar,visjonar

medan hjartet ropar
kvelte lydar, frå ein stad inne i tåka;
kanskje frå djupet - kanskje frå høgda

-

andre gonger er gleda eit dekke
over andre gleder
eller eit usynleg lag over det ekte

eg smiler
og tåka er vekke,
det bakanfor er alt som vert vist

-

det er der eg prøvar å vere;
tilstade i mitt eige liv
utan maske -



(NF blo-ma)

søndag 24. august 2014

sense




#dotter

I dag har far og dotter vore på sykkeltur på fjellet. Ei fantasifull reise i storslegen natur! Dette er ein dag eg vil hugse, og eg håpar den sit att som eit positivt minne hos femåringen. Viss nokon skulle lure på kvar dette er, er bileta tekne ved Oddatjønndammen på Blåsjø. 


(Haiku horizons, Helgbilden)

Gjennom glas




mellom meg og deg
ein vegg, ein veg
å leggje bak seg –

eg strekk ut handa
legg den mot det kalde glaset
møter auga dine

ser inn i ei anna verd
der alt det kalde her
er farga raudt og varmt





ein straum av bilete
filter på filter
over mine regngråe sukk

du legg handa mot glaset
frå andre sida, innsida
av alt eg ynskjer;

eg held auga dine fast
ser at du opnar munnen
og splintrar veggen med eitt ord –
 


(Fototriss)