Einsemd som lokkar

sakte sig einsemda innover fjellsletta,

sig inn frå tause dalar,

blekkstille vatn og nakne vidder,

kjem rullande som ei tåke, sakte

nesten umerkeleg

til heile eg er omringa av einsemd –

ei stille einsemd

av den gode sorten

ei einsemd av typen ein lengtar etter

på andre, heilt vanlege

oppjaga dagar

ei einsemd ein kan pakke rundt seg

som ei varm og mjuk vinterdyne

og kjenne at det gjer ingenting

om einsemda varer

ei god stund

til

(Our world tuesday)

Omvelting

haustlauvet gøymer seg i plenen

har gøymespel

i det lange graset – for grasklipparen

har teke vinterferie

og trea er blitt sadistar

og ingenting er som det var

eller skulle vere

at ei omvelting

kan gå så fort –

kven kan fatte det?

ein dag hengje som det friaste blad i Guds natur,

den neste verte tømt for alt liv og forkasta,

slengt vekk som biologisk avfall – noko ubrukeleg

og tørt

kven som helst

hadde gøymt seg vekk

i skjelvande forvirring

og tungsinn

under slike forhold

Tidsperspektiv

Det er ikkje alltid tid er tid
og rom er rom for alle –

Set sniglane fri,
sa eg,
sendte borna ut att
med klare ordrar
og ei litt bekymra rynke i panna

For sniglane sin del…
Dei var ikkje komne over til andre sida
av bøtta endå,
og merka vel knapt
at miljøet i det heile var endra –

(Mandagstema #98)

Musikkgåte

Fototriss denne veka har tema 'ein låt'. Her kjem tre bilete som skal illustrere ein låt. Ser du kva for ein song det er? (Trur denne er litt enklare viss du er norsk...)

Kanskje du har løyst det no? Her kjem i alle fall eit hint til:

Kom attende

Kom attende, kjære ven,

du som varma og gledde

skapte håp

etter frost og kulde,

is og død

La meg endå ein gong danse stille

til dine glade tonar, stille musikk

og leve nær

det beste i livet

Viss du ikkje kjenner att songen, finn du teksten her.

Pixelsommar

sommaren er ikkje meir – no

enn eit bilete, koda i 0 og 1

til ei fil på datamaskina,

der blomane strekk seg, optimistisk

over det flatklemte rommet

mot ei sol som ikkje lenger varmar

anna enn minnet

(The weekend in black and white)