Resept

ingen kjenner innsida
av den andre si lengt,
lukta av redsle som heng til tørk

dagar med sol i strenge porsjonar,
regn i millimeterbeger
på ei hylle

netter med skriket frå ein nattergal
om att og om att
som eit lydspor i loop

ingen kjenner utsida
av det som berre vidar seg ut 
i det tomme verdsrommet, det som vaknar
først når du har gitt opp --

det fulle volumet av ein regndråpe,
med plass til alt du veit
og alt du burde vite

Rush

ein av dei dagane
        då ein gjerne ventar
til rushtrafikken set inn
        med å leggje i veg

berre slik
         at ein skal føle
eit slags fellesskap

Sovande stein

så lenge sat han
aleine i kjøkkenkroken
aleine i stova
aleine i gongen
 
aleine sov han
aleine vakna han, så lenge

at vulkanen bak hjartet
vart ein sovande vulkan -

så lett det ville vore
å tenne den vesle gneisten
som kunne knust fjellet;
eit smil
eit hei
eit lite ettermiddagsbesøk

men ingen kom

Stilla og eg

Soleiebarn #20

Soleiebarn #5

Soleiebarn #4

Omriss av eit liv

glittervengjene slår i vinden
du er ein fugl på veg
over havet

silhuetten viser retninga på ferda
omrisset viser kor du er –

men bak dette vakre ytre
er det vel ingen som veit
kva gøymer seg
- i den store einsemda
på eige hav,
er vi alle i kvar vår båt

Aleine #10

tre gongar i timen

sjekkar eg klokka

held den opp til øyret

stirrar på visarane

er sikker på at den har stoppa,

endå tikkelyden er der

og visarane flyttar på seg

så mange lange timar

før du kjem att

Aleine #9

det nyttar ikkje rope

- eg har då visst prøvd

stemma ber ikkje

heile vegen frå djupet

av lengten min