Tomme bøkers veg

Har du nokon gong vandra ned

Dei tomme bøkers veg?

Sett soloppgangen bak fjella i aust,

når alt er taust og stille før dagen –

endå søv orda sin uskuldige søvn,

og ventar, med blomar under hovudputa

Har du gått i dei stille gatene,

høyrt slamringa frå skoddene som slår i vinden,

hundar som tassar mellom boksidene

og rundar til neste side

før nokon får tid til å jage dei vekk?

Har du høyrt nattlydane

frå tusen sovande ord,

bokstavar – fot mot fot i store senger

og dei lukkelege draumane

om trygge hender og djupe auge

flygande som flaggermussvermar over linjene?

Har du vore der

når alt vaknar til liv,

kjenner du, meir enn du ser eller lyttar,

at alt fell på plass –

for alle er vakne, og ferdig stelte,

i det du tek på deg brillene

og opnar første blad…