søndag 6. desember 2015

Lys og mørke



1
eg speglar sjela mi
i verda rundt meg

somme dagar ser eg klart
det mørke vatnet
som skjuler mine inste håp

somme dagar ser eg klart
håpa som ligg skjult
under alt det mørke

andre dagar ser eg tydeleg
lyset som blendar
utsikta inn mot framtida

andre dagar ser eg tydeleg
vegen inn i framtida
gjennom lyset over horisonten



2
i natt var dette treet
ein flytande båt
på det store verdshavet

bølgjene førte det rundt
til framande himmelstrøk
og vindane bles det vidare bort

ingen stadar fann det feste
alt var svevande mørke
under rotlause, tause stjerner

men så kom dagen
og treet fann seg sjølv att
akkurat der det ville vere




3
det ventar eit lys
der framme ein stad
etter dette
slukande mørket

ein stad du kan danse
andre dansar
enn melankolske steg
i din eigen ørken

eit lys som vil opne opp
vegar du ikkje kjente
før du såg dette gløttet
av ei anna verd bak siste sving




(Fototriss. Stilig julegåve hos coolstuff: Boblekalender!)

fredag 4. desember 2015

Vinterkart



finne vegen i eit anna landskap;

vere den som har overblikket
utanfrå, i perspektiv

- trasse vindar, trasse kulde
trasse motet som sviktar

i stilleståande mørke,
med ei visse om vegar mot natta –

likevel finne vegen
i dette landskapet

kjenne røtene strekke seg
djupare enn auga rekk


torsdag 3. desember 2015

Den stille elva



dette er ei stille elv
med ukjente kjelder

ein veg gjennom det turre;

me byggjer bru over djupet
festar auga på fjella når vi passerer,

lest som elva ikkje er der
at alt det grøne veks av seg sjølv

- sett slike flotte enger
seier me, sjå kva me får til –

og elva renn vidare, stille
som eit taust vitne i verda

er ei åre til liv i seg sjølv



tirsdag 1. desember 2015

Restar av lys



eg ser det i auga dine
og i sporet dei lagar
der blikket flyttar seg
vidare fram langs vegen

glimt av lys
heng ved deg
som refleksar
frå æva

heng fast i kleda dine
som sagmo, fliser av lys
frå ein mektigare verkstad
der mørke hjarte vert dreidde på ny