Viser innlegg med etiketten engel. Vis alle innlegg
Viser innlegg med etiketten engel. Vis alle innlegg

mandag 2. desember 2019

Begeistring

strålar frå ei stjerne
ein engel som svinsar forbi
utanfor glaset

smiler inn til
begeistra born
intenst ventande med opne auge
og hjarta på stilk

svevar med vinden til alle krokar i verda,
syng ein ny song
som alle kan lære
- for det er ein gamal song,
gøymt mellom celler og atom
som ein note i ein gamal koffert på eit loft

det gjeld
å finne den
blåse av støvet

og synge i veg!

fredag 6. januar 2017

Engel


vesle bodberar
frå andre dimensjonar,
syng din song
i mi mørke natt
syng din song
til hjartet kan smelte

og auga kan sanse lyset
i ferd med å stige opp
bak vitet sine mange horisontar


onsdag 24. desember 2014

Det stig ein song





det stig ein song
i Marias hjarte
Halleluja!
ein himmelsong
med tonar bjarte
Halleluja!

det stig eit kor
med himmelsk lyd
Halleluja!
eit englekor
frå nord til syd
Halleluja!

der ligg eit barn
inni ein stall
Halleluja!
eit lite barn
med himmelsk kall
Halleluja!

i denne natt
vert verda ny
Halleluja!
velsigna natt
for land og by
Halleluja!

søndag 7. desember 2014

Fenomen





tenk om du låg vaken
den første julenatta,
du telte dine sauer
og sukka tungt, frustrert

tenk om du tok beina fatt
og gjekk til vindauget,
såg på stjernenatta
som var endelaus og blå

tenk om du i det sekund
fekk sjå eit fenomen,
eit lysglimt – følgt av fleire
fylte byen din med song

og tenk då, om du høyrde
dei orda som vart sagt
og tenk om du, i hjarta
visste at det alt var sant

tenk på denne undring
ei glede følgt av håp,
for alt du veit og alt du har
har fått ein annan glans

fredag 3. januar 2014

Engel



eg veit ein engel
med plass til mange
mørke dagar, mørke tankar
under vengjene sine –

han gøymer dei
vekk for verda
og bringer dei dit
slike dagar høyrer heime

og eg sit att
med eit smil om munnen
og ser at lufta har fått ein annan glans
der han stod



mandag 2. desember 2013

Frå litt oppe

 



viss eg var ein engel i englekoret
som song over marka
ein ukjent song, ein ny melodi
som ingen endå kjente –
då ville eg sett med store auge
på alle menneska som fortset å gå
med auga feste i bakken
og børene tunge på skuldrene

utan å merke seg ved songen,
utan å stanse og lytte
og la seg fylle av gleda
og triumferande juble; eit håp er blitt født!

viss eg var ein engel som song
og såg verda frå litt lenger oppe
ville eg nok undra meg – ei ukjent smerte
over alle som kan nå det eg aldri kan få

og likevel snur seg bort