søndag 1. mars 2020

Plikt og redning

av rein plikt
ordna han med sitt eige selskap

sende ut invitasjonar
men skreiv med vilje små feil
i adressene

og sende så seint
at dei fleste kom fram
dagen etter festen
(med sinte notat frå posten)

og dei næraste, dei
som visste om selskapet
og tida og staden
og kunne møtt opp
festpynta, med gåver og godt humør

dei var trass alt dei næraste
og visste om den beste gåva:
å ikkje bry seg i det heile

dermed vart det ein stille kveld
og det gleda hans einstøingshjarte;
- verdas beste vener
tenkte han fornøgd
og sløkte lysa i lokalet
som aldri var sett i stand


Ingen kommentarer:

Legg inn en kommentar