Ei bok om oss

side 20

du vert introdusert

og treff den andre hovudpersonen

som i denne boka

tilfeldigvis

er meg

(kanskje lurar du på

kvifor du er med i akkurat denne boka?)

side 28

eg tek handa di

du smiler

side 35

du kastar ein fullt knuseleg kopp etter meg

i sinne

eg grip den i siste liten

side 36

du smiler til meg

eg smiler tilbake

side 48

eg spør om det er oss

og du seier, ja, det er oss

side 50

det er oss

side 177

det er fortsatt oss

side 286

ikkje så mykje som skjer

litt fleire rollefigurar, berre

du smiler fortsatt til meg

eg smiler tilbake

side 287

du smiler til meg,

eg knyter hendene

og ser strengt på deg

side 288

så smiler vi att

side 316

ja, fortsatt smil –

kjære redaktør, eg veit ikkje…

trur du folk gidd lese dette?

det er kjekt å skrive

men

det skjer ikkje så mykje akkurat

side 320

vi avsluttar boka her

og går over til neste bind,

så får vi sjå kor mange som orkar

henge med

…

terningkast i Aftenposten:

2

‘sovna på side 36’

teaser bok 2:

fleire smil

fleire koppar som vert kasta

og gripne

i siste liten

og endå fleire smil

og sikkert ei tåre, dørsmelling, strenge blikk

og smil

mange smil…