18. mai 2020

i dag ligg ispinnar nakne
blant reiler som no står still
men nettopp i denne timen
kan me nok klare ein til

der stig ein song over hagen
håpande i sitt språk
skjønt, nynna med smale lepper
for is-mas på måndag = bråk

Ny mat

det nye livet spirar

ekspanderer i det tome rommet

etter ein vinter som drog,

strekk seg

mot lyset, mot vatnet, mot vinden,

let seg bere av noko utanfor seg sjølv

let seg vatne med levande vatn,

føre med tida

mot ein stad der livet ikkje lenger

er nytt

og kunnskapen er mogen,

den nye maten

fyller opp tomrommet

etter det som forsvann –

(mandagstema, fri tolking...)

Pære

Eit laurdagsdikt på ein torsdag... berre fordi eg likar pære så godt! (Torsdagstema)

 

Når lakrisen tyngjer som stein

og renn som seig sirup i kroppen

Sjokoladen smeltar på tunga…

Når brusen er slokna, heilt temt,

eg klarar knapt svelgje ein dråpe (til)

Sjokoladen renn mjukt gjennom halsen…

Når chipsposen knitrar, og sofaen gynger,

dropsen er borte, og samvitet tyngjer

Sjokoladen boblar i blodet…

Då skulle eg ynskje

det var deg eg åt

du saftige, fristande pære!

Twist

Korleis ville twistposen vore

viss alle bitane var japp?

Då ville det vore ein japp-

pose, ikkje noko anna

og daimposar finst allereie

for dei som likar einsretting –

og hadde alle bitane vore cocos,

ville eg alltid hatt posen for meg sjølv,

noko som ville vore kjekt

i omtrent fem minutt,

og sidan ville eg kjent på

einsemda i å ete twist – aleine

for slik er det ordna

at eg likar cocos og du likar nougat,

vi likar caramel

og de likar lakris, og han likar daim

og ho likar toffee og dei andre

likar resten

dermed kan vi dele

og alle vert fornøgde

og magane vert passe fulle

av deilige bitar

og fjesa vert passe farga

av fellesskapssmil

-

Korleis ville twistposedelestunda vore

viss alle likte berre japp? -

Ah, mangfald, folkens

Mangfald!

(Fredagstema)

Frå det eine...

I det brøytekantane krympar saman,

renn vekk under vårsol

og varmen som endeleg kryp fram

frå vinterdvalen,

og snøen (endeleg!) har gitt opp kampen

og huene er pakka vekk, vottane

lagt til ro

og sommarjakka funne tilbake

til sommarresidensen,

og fuglebrettet er teke ned,

benken sett på plass framfor huset,

grusen er kosta vekk frå asfalten,

og vårskoa spring lett, fleire centimeter over

bakken

I det vinterkulda omsider har slept taket

og ny solkrem står og dirrar av forventning

i kjøleskapet,

er det berre ein ting i tankane mine,

trass alt:

IS!

(Måndagstema hos Alt som er vakkert: kaloriar)