Den verkelege verda

1

Nokre ser på verda som i gråtoner,

ser sitt eige liv

og andre liv

som lyse og mørke skuggar

mot kvite og svarte veggar,

ser alt som hender

som tilfeldige forløp

der utgangspunkt og mål

er likegyldige faktorar

Ja, nokre ser verda i gråtonar

og plasserer seg sjølv

som eit penselsprut

i det som slett ikkje er eit maleri

men tilfeldig søl

av svart toner

2

Nokre ser på verda som ein illusjon

ser sitt eige liv

og andre liv

i lys av draumar og fantasiar

utan bakkekontakt

eller samanheng

ser det meste som hender

som ustyrteleg morosamt

eller djupt tragisk

utan at nokon av delane

verkeleg berører

Ja, nokre ser verda som på film

og plasserer seg sjølv

i ei av rollene,

undrar på kva som vil stå

i rulleteksten

 

3

Nokre ser på verda som ein kollasj

ser sitt eige liv

og andre liv

som bitar av noko større

noko fargerikt og lyst og mørkt

og uendeleg

ser alt som hender

som eit ledd

i ei handlingsrekkjefølgje

med meir eller mindre meining

Ja, nokre ser verda som noko logisk

og plasserer seg sjølv

som ein tiltenkt bit, noko skapt

i det skapte,

noko vakkert i det vakre

noko grått i det grå

noko fritt

med alle sjansar opne…