Båten og havet

Eg er ein båt 

Du er havet 

Eg er uløyseleg knytt til deg 

Du eksisterer fint i deg sjølv 

Utan meg 

Men held meg likevel oppe – 

Eg er ei åre

Du er vatnet

Stilt let du meg komme

Stilt let du meg gå

Utan eit motord

dyttar du meg endå ein bit – framover

Eg er den flytande,

Du er mi motkraft

I går var det stille

I dag er det storm

Og morgondagen – kva veit vi om den?

Det er i dag vi kjempar,

og du let meg vinne, gong på gong

 

Eg er forgjengeleg

Du er evig

Sakte, men fryktfullt

går mine fiber i oppløysing

Du er kompakt, slår dine taktfaste slag

mot stadig nye båtriper

 

Eg er eit vrak

Du er uforanderleg

Mine vegar må ende

- men også dei i deg

Til slutt vil du gøyme meg,

pakke meg inn –

til sist er eg oppslukt,

usynleg for verda, borte frå bølgjene

men endå i deg – 

(our world tuesday)