Viser innlegg med etiketten møte. Vis alle innlegg
Viser innlegg med etiketten møte. Vis alle innlegg

fredag 19. oktober 2018

Eit pusterom




det er midt i livet me treff kvarandre
der kvardagane kryssar sine eigne spor
på vegen        mot noko anna
som ventar der framme

akkurat der mitt spor går
og ditt spor går        tilfeldigvis
på same staden
og me kan slå av eit smil
og litt prat

for livet er både eit rom og ei dør
som leier oss vidare
inn i nye handlingar
og ved veggen står ein sofa
som kanskje vert brukt
litt for sjeldan





lørdag 17. februar 2018

Den som ikkje leitar kan også finne



det var ikkje meg du leita etter
då du snørte skoa på deg
og sette døra til det gamle livet
på klem –

du leita ikkje etter nokon
det var hjartet som var kompasset
kviskra retning, fart
tid
føtene brann seg gjennom asfalten
det rasla i lauvet der du gjekk

dei tause fuglane observerer
frå sin utkikkspost på telefonlinja
det er tida, sukkar dei
tida som akkurat no er den rette

for du leita ikkje
før akkurat då du fann meg

då slutta du å leite


mandag 22. februar 2016

Alt vi ikkje ser




menneske du møter
i kvardagen, tilfeldige
tilfelle av DNA og tankar
og ånd
- at det vart nett desse,
og ikkje andre -
og du tolkar, du les, du tyder
signala fløymande gjennom luft-
atoma, som brev – eller utdrag
frå ein endå lengre
utilgjengeleg tekst

og du anar, for du veit
- fordi du kjenner deg sjølv -
at her er mykje du ikkje ser,
der er fleire lag, ein djupare grunn
som aldri vil skine gjennom
i så stort monn at du vil kunne forstå
eller vite
kven – og korleis
alle desse
verkeleg er…

så møter du menneska
- tilfeldige passeringar -
og kanskje smilar de,
kanskje endrar du kurs
                       på grunn av dette
men overflata de viser
skjuler uendelege landskap
av mystiske dimensjonar 
bakanfor