Nyttårsdikt

Tidsmaskina

Ny start

det første kalenderbladet er utan blekk

dei elleve andre endå usynlege

snart startar aldringsprosessen også her,

men først skal eg smile og håpe

det vert ei lukkeleg aldring

for alle

dette året

Alt vi ikkje visste

alt vi ikkje visste

i 1979

at Gorbatsjov skulle ende

den kalde krigen

at Saddam Hussein

skulle setje oljebrønnar i brann i Kuwait

at Tsjekkoslovakia skulle rakne i fred

at Jugoslavia skulle rakne i krig

at tvillingtårna skulle falle

at Berlinmuren skulle falle

at Afghanistan skulle falle

i hendene på Taliban

og IS herje med bomber i Europa

at Syria skulle falle

i eld

at sjølve feriehavet skulle bli

ei grav for så mange på flukt

alt vi ikkje visste

i 1979

då vi telte ned, frå 10 – 9 – 8 –

mot det nye tiåret

alt vi ikkje visste –

alt vi ikkje veit

i 2017 –

Nye sjansar

1

det er så mange dagar

sidan løfter vart gitt

dagane låg der – framfor

uskrivne som ei snødekt vidde

og no –

kvart einaste skinande ord

ligg flekkete, trampa i bakken

og mismotet kan fylle den

som prøver å halde dei reine –

2

fatt mot

er bodskapen frå kruttmakaren

det kjem nye sjansar

etter neste snøfall

(Søndagstema i farge og svart/kvitt)