mandag 20. august 2018

Den eine




kanskje er der mange niåringar
med draumar og lengslar
og merkelege nykker
og ord som ikkje alltid finn vegen
til overflata

kanskje er der mange jenter
tråkkande i stadig større sko
og oppgåver som kjennes som eit hav
med knusande bølgjer mot stranda

kanskje er der mange drøymarar
med vikande auge
i møte med stormen,
kanskje er der mange som treng trøyst
når den skjøre fasaden rasar
og livet buttar imot

likevel
er du den eine, den unike
den som er berre deg og berre du
kan leve dine dagar, drøyme dine draumar
dine stiar som best du kan

berre du er den eine
som må møte dine drakar
og dine djupner
berre du kan finne vegen
gjennom din eigen labyrint –

men vi står her
like bak deg og heiar
alt hjartet og pusten er god for


Ingen kommentarer:

Legg inn en kommentar