tirsdag 23. desember 2014

Stjernene kviskrar





eg opnar boka
ser bokstavane danne ord
og orda setningar
som strekk seg,
stig får papiret

vert eit stjerne som
flyt over sidene,
når fram til stallen
og ber meg stige inn

med ei stille kviskring
stjernestrålar mot øyra
ber meg knele,
gje barnet –

alt mitt gull,
det eg held for viktig
og kjært, det eg har samla
som skattar langs denne vegen
eg har gått;

all min myrra,
gje han kongenamn
og herredømme
over alt det eg før
kalla mitt;

all min røykelse,
bli verande her, og på kne
be mine bøner
til han
synge mine songar
for han
rope mine klagerop
til han
og tilbe han
resten av æva;

og stjerna stansar her
held fram si stille
konstante kviskring:
hald blikket, mann
hald blikket…

mandag 22. desember 2014

Lengt møter lengt





eit sukk
fylt av lengt
stig frå jorda,
frå hundreårs slit
over arbeid
og sorg
som går djupare inn
enn det djupaste
hav

eit sukk
fylt av lengt
stig mot stjernene opp,
frå dei hundre millionar
sveltande kroppar,
tørste på kjærleik
og fred

eit sukk
fylt av lengt
stig frå himmelen inn
i vår verd,
eit barn opnar auga
vår Gud allting ser,
og møter vår lengt med
seg sjølv

søndag 21. desember 2014

Near







(haiku horizons)

Frå ein annan dimensjon





eg ser eit gyllent skjær
i gatene, som skimmer
av gull mellom steinar
og eit stille lys
mellom vissent lauv
og sand og støv

der er eit gyllent skjær
eit drag av noko vakkert
og nytt, noko annleis
enn våre fotspor –
våre spor gjennom tida,
hundreår i blodig hovmod

vi går i gylne gater,
lyssett av noko anna
enn våre halvhjarta forsøk
på glitter og stas
- alt bleiknar,
sett i dette lyset
frå ein annan dimensjon

lørdag 20. desember 2014

Puslespel





det er nokon
som legg puslespel
med brikker
av organisk
materiale

det er nokon
som leitar og finn
i natta
sine brikker
på tapte
stader

det er nokon
som med iver
står og ropar
ut
i natta:
kom heim
frå ville vegar
kom heim
frå tapte fjell

det er nokon
som legg puslespel
med smerte
aldri godtar
tause fråvær
tomme rom –