Byfuglar

Flygande auge
over ein by,
trassar tyngdekrafta
og alle organiserte reglar

Flygande
over ei maurtue
- ser våre bundne steg
med eit skuldertrekk

Rastande føter
tek alt som sjølvsagt,
utan livet sjølv
- utan lengten
etter sorglause svev
over gater og hus

(Onsdagstema, Black & white wednesday, Wednesday around the world)

Sommarminne

Eg hugsar dei dagane

barne-tv vart gløymt

og innetidene vart utsett

litt til –

då vi sprang barbeint

med grønske på knea

og støvgrå tær

gjennom nyslått gras,

over altforvarm asfalt,

i rislande, iskalde bekkar

dei dagane vi måtte klatre

i murane, strekke oss

innover buskane

for å få tak i frisbeeane

eller badmintonballane

eller papirflya

eller sprettballane

og lukta av sommar,

lukta av varme kroppar, varmt gras,

varme timar limt

til funklande auge

og varmen i dyna

når ein til slutt måtte gje etter

og senke ein ferdigleika kropp

inn i sommardraumane –

Rydd veg

Høyrer du ropet

frå ytste utkanten

av tid og rom,

der æva startar?

Rydd veg

for lyset,

rydd veg

gjennom alle urskogar

gjennom kratt og urydda skog

over haugar og fjell,

frå der du står

og så langt du kan komme –

Rydd veg

- for lyset

(NF catching the light)