Måneskot

han hang på vippen,

siste runden

gjekk vel fort

så det vart skrens

og ei rulle i sakte fart

nedover fjellsida

under låg fjorden stille

med attlatne auge;

ynskjer…

ein storm frå vest

ein fønvind frå aust

snøflak som smeltar mot overflata

eit islokk, ei sommarsol

badelatter og snekker

med taktfaste bylgjer

mot rullesteinsstrendene

teier viseleg stilt

så alt skal få skje i si tid

Viss vi berre...

viss vi berre
tenkte gjennom alle orda
før vi sa dei

viss vi berre
høyrde meir på hjartet
enn på fordomane

viss vi berre
kunne elske naboen like høgt
som oss sjølv

viss vi berre
hadde brukt alle tinga som leigd
ikkje eigd

viss vi berre...



#kong Bele

Her har kong Bele sitte og fundert og sett utover Sognefjorden i mange lange år. Då eg var liten, var han kjekk å klatre på. I desse tider fristar benken mest...

Nostalgi/6080

6080, 6392 –

Kven kan vel gløyme tala,

lysande nummer langs vegen

mot den vaksne verda?

- ok, eg hugsar dei ikkje…

Men eg hugsar kva dei stod for,

og lengselen dei skapte

for ein ung og håpefull,

om enn realistisk

legoentusiast,

som visste at sjansane nok var små -

Likevel!

Draumane på kanten av senga,

der legokreasjonane stod på rekke og rad

og venta på 6080, 6392 –

var levande, og auga stira seg store og runde,

vart trekt mot dei glansa bileta

Eg lagra kvart einaste hefte,

endå dei var prikk like

og draumen ikkje kom nærare – likevel

likevel håpe

ja, håpe likevel på at kanskje --

til jul… eller neste bursdag… eller i sommar…

Mindre

Om eg skulle ynskje meg noko –
Om du bad meg skrive ei liste
over det eg ynskjer meg mest
ville eg skrive

Mindre!

Mindre vald, mindre våpen
Mindre kulde, mindre hat
Mindre egoisme
Mindre narsissisme
Mindre gråt, mindre smerte, mindre frykt
Mindre prating bakom ryggar
Mindre pengar under bordet
(eller over bordet, for den del)
Mindre misbruk, mindre einsemd
Mindre død og mindre sjukdom

Mindre mitt og ditt og hald deg unna
Mindre flytt deg vekk for her kjem eg
Mindre dette klarar eg aleine
Mindre her er det inga hjelp å få
Mindre

så mykje mykje mindre

Dessverre er mindrelistene
mykje hardare å oppfylle enn
meirlistene