Kva er det med livet

kva er det med livet,

at det kan vendast

og vridast

og verte snudd heilt om

på så korte augeblikk

at kven som helst

kan dette av

og likevel kan ein klamre seg fast

som gjaldt det nettopp

livet

og presse seg gjennom, tvinge seg opp

og tvinge alt det svarte i kne

fordi ein vil

fordi ein må

fordi ein ikkje har noko anna val

enn å kjempe imot;

og så oppleve underet på ny,

at ein ny soloppgang fargar verda

og knoppane sprett

i vindstilla etter vinterkulda

og gleda siv opp frå frosne marka

der tæla må sleppe taket –

og det snudde vert vridd på plass

om enn i nye stillingar

og det tapte vert funne

om enn i nye former

og det du lengta etter finn stad,

endå du ikkje visste

at det var dette, akkurat slik, akkurat no

det heile leia fram til –

kva er det med livet,

at berre ein held fast lenge nok

vil lysglimta sive gjennom

og gode vindar blåse

og regntåka sleppe taket

lenge nok (og kanskje meir)

at ein finn det verdt

å vere i det?

Ei verd på vranga

1

heilt opp hit

på grunnene i livet

hamner kjenslene

av ei verd i stadig endring;

at alle ting flyt – alt

utan grunnen under kjølen

som no står fast

som diamant

2

verda er ei anna;

då eg vakna

hadde sola bleikna

og stjernene gjekk i krins

om ein liten satellitt

eg trødde ut på vatnet

som i går kunne romme alt

eg ikkje ville sjå,

no vart det heile tømd tilbake

i ein kaotisk straum

- frå gløymsla og inn i hjartet

3

dette er verda mi,

det er her eg held balansen

mellom avgrunnar og meiningsløysa;

går mitt tilmålte strekk

som i ein dis –

berre under det heile, (eller bakanfor)

(utsikta frå auga)

ser eg faste punkt

noko stødig

å navigere etter

I det skapte

naturen som lenar seg
oppover, mot noko større
i stille venting;
her vaks det ingenting
av seg sjølv,
her flaut kjeldene fram
først etter at orda var talte

eit landskap
skjelvande i undring
over korleis alt vart – 

i dette ser eg refleksjonen
av det hjartet lengtar etter;
ein storm midt i stilla
eit mørker
som må gje tapt
for det skapande Ordet

Den nye våren