Viser innlegg med etiketten småting. Vis alle innlegg
Viser innlegg med etiketten småting. Vis alle innlegg

mandag 24. februar 2014

Det er noko...


Det er noko
med desse små vekstane,
desse som du aldri ser
fordi dei er så små, så beskjedne
og stille og skjulte i verd
der alt er så smått

Det er noko med desse små
vekstane, desse som veks i det stille
utan at nokon ser, utan at nokon høyrer
eller klappar i hendene
og jublar over det dei får til

Det er noko med desse
små små venene, våre naboar
som aldri vert besøkt, aldri bankar på
aldri ropar etter deg på vegen -

Det er noko
med desse - viss du bøyer deg ned,
vågar deg ut av det vante
og ned på eit anna plan - vil du sjå,
det er noko med dei...

fredag 11. januar 2013

Såpeboble



Luft i ei boble,
fanga i tynne hinner
eit fengsel av såpe og vatn

Lengten oppover
mot den blå fridomen;
flyte på luftstraumane

Det naturstridige
i å liggje på bakken,
puste – i fangenskap – puste
av lengt og fortviling

Det håplause håp: Sleppe fri
Når dei brest
er alt likevel over

Paradokset i det
at no, først no
er lufta fri til å sveve