Leiande lys (langs stien)

1

dagen kjem

nytt lys

lyser opp stien

for dine føter

så nære å snuble

så trøytte etter natta

så lengtande

etter noko

som viser vegen

2

vi treng merkesteinar

vardar i terrenget

punkt i livet

som fortel kor vegen går

kor vegen vil gjere ein sving

og om toppane

eller nye bratte fjellheng

er i vente

vi treng noko

å feste blikket på

så kursen er stødig

og

vi treng ein kurs –

3

somme tider

kan vi finne lyset

spegla i våre eigne hjarte

somme tider

er det som noko trengjer gjennom

landskapet, som ei å

fyller oss med lys

let gleda strøyme til overflata

og skaper heilt nytt liv –

så kan vi vite om grumset på botnen

så kan vi vite om smuldrande veggar

så kan vite om mørkret og tåka

like fullt

somme tider

kan vi finne lyset – akkurat her

4

eg lengtar

etter det eg har

eg søker

staden eg står

eg håpar

og håpar og håpar og -

eg gret

over det eg ikkje har mist

eg trur

endå eg trur at eg veit

at det som eg trur

er det som eg veit

5

og så kjem natta

ei varm omfamning

klemmer din skjelvande kropp

med sin fred

og stille

du kan sove

vere trygg

i Fars

omsorgsfulle armar