Forfall

skoen kan forfalle

tilbake til sin naturlege tilstand,

vere skinn på flodhesten sakte duppande

under overflata i jungelvatnet

lengre oppe

svingar lissehola seg i lange lianar

festa som vakker sutur

over kveldshimmelen

ingen kjenner att hælen

som no heng som eit lodd over vegen

der du snart skal trø, barbeint

i fare, ei tankelaus fluge --

Opprør

det var fjellskoa som sladra

eg høyrde dei ei natt

eg ikkje fekk sove;

gjekk ut for å drikke vatn,

høyrde skoa kviskre saman

bak nattsvarte skyvedører

lista meg nærare, lytta

lett pinleg berørt

over mitt eige svik

høyrde dei insisterande åtvaringane

om myrlendt terreng

spisse steinar

mose som aldri slepp taket -

sidan den natta

har eg gått berrføtt

på alle turar

Nye vegar

1

det er dei litt slitte skoa

på slitte gater

i ein litt slitt by

ein sliten mann

med slitne sko

i lange, slitne gater

tusen tause stjerner

ein taus mann

i to tause sko

i ein litt stor by

under store, usynlege stjerner

må sitje og kvile litt

her

2

eg våga meg ut på dei store djupnene

våga meg utpå, djupnene lokka

meg ut, med ei klokkeklar røyst

mellom fjellveggane, ei dirring

djupare enn mine indre djupner

ei lengt ingen visjonar kan temme

eg vart dregen av ein luftstraum, eit dragsug

etter stemmene i djupet – kom ut

der du vil skjelve av skrekk – kom ut

til eit land der du ikkje har kontrollen –

eg våga meg ut

på dei store djupnene

våga meg utpå

når djupnene lokka

3

nokon må leie

mine steg

i den nye verda

nokon må halde

lyfte meg opp

når eg fell

nokon må vise

vere eksempel

langs vegen

nokon må støtte

vere haldepunkt

og trygge veggar

nokon må vere der

berre vere

der, for meg

(Fototriss)

Vårkjensla

Den beste kjensla av dei alle
den som seier
til hjartet
at no er det vår
No! Kan alle ting skje!
er kjensla
av nye joggesko,
på bein som har vore nedtyngt
av tunge vinterstøvlar og
vinterdressar og snø og sørpe

No kan dei springe
som trommestikker 
over nyopenberra asfalt,
langs iskantar og smeltevatn
over spirande gras
gjennom vårfrisk luft --

Ingenting gir vår
som det!

(Mitt (av naturlege årsakar litt forsinka) bidrag til måndagstema hos Alt som er vakkert: Vårteikn)