Vårbriller

Ekspresjon

så bur det eit hjarte
i jorddjupet,
bankar sine gudgitte impulsar
gjennom røter og kvistar

snur notearket
og spelar den gamle melodien
frå starten av - endå ein gong
med sine kryss og halvnotar
i nyansar av si eiga historie

gir uttrykk for noko basalt,
noko som er nedlagt
frå tida si morgon,
då Herren kviskra det første frøet og sa:
bli vår
og fyll jorda
med glede

Vårkjensla

Den beste kjensla av dei alle
den som seier
til hjartet
at no er det vår
No! Kan alle ting skje!
er kjensla
av nye joggesko,
på bein som har vore nedtyngt
av tunge vinterstøvlar og
vinterdressar og snø og sørpe

No kan dei springe
som trommestikker 
over nyopenberra asfalt,
langs iskantar og smeltevatn
over spirande gras
gjennom vårfrisk luft --

Ingenting gir vår
som det!

(Mitt (av naturlege årsakar litt forsinka) bidrag til måndagstema hos Alt som er vakkert: Vårteikn)