Viser innlegg med etiketten dobbel. Vis alle innlegg
Viser innlegg med etiketten dobbel. Vis alle innlegg

lørdag 23. mai 2015

Dobbel



1
det eine nært
det andre fjernt

som pust på veg inn
og pust på veg ut

noko nytt, noko gamalt
og likevel heilt likt –

to uttrykk for det same,
ein samanheng – eit band

som to bitar i det tidfaste
verdspuslespelet 




2
det nysprungne livet skjelv,
her er så kaldt –

denne nakne kulda
i ei opa verd

der vindane flyttar seg
og vatnet renn

og ingenting verkar stadfast,
lunt og varmt eller trygt –

så lat oss lene oss på kvarandre,
finne livd i ein felles lengt





3
så er du spegelen min,
eit bilete av mitt eige bilete

slik eg sjølv speglar noko anna,
frå ei verd av andre substansar;

så rører du deg ikkje
utan at eg gjer det same,

liksom styrt av desse
usynlege, ubrytelege fotonbanda

ikkje ulike dei som held også meg
i stadig rørsle mot æva