Søsken

Det skulle vere lett å forstå

at ingen kan fylle plassen

i eit hjarte

som ein bror

med trehjulssykkel

og plass på bagasjebrettet

og plass i leiken

og plass i hjartet

til ei lita søster med tindrande auge

og håpefull stemme

og ei grenselaus tru på at han,

sjølve Broren,

at han sjølvsagt har rom for ein søsterkropp

i leiken

Ja, det skulle vel vere lett å forstå!

(The weekend in black and white)

Skrive med tre

Bror min er tømrar

skriv sin tekst med tre og spiker

Hamrar den fast til berget,

fullt leseleg for alle som vil sjå,

vitnar om det menneskelege språket:

byggje opp, reise landemerke

kommunisere vårt vesen frå hjarte til hjarte

Bror min skriv

det eg aldri kan seie:

Her gjekk det eit menneske,

her slo han opp sitt hus

sin familie, sitt liv

Kvar spiker syng teksten

eit kor av tre og metall

Kvar gong eg kjem over eit falleferdig hus

i skogen, på eldgamle tomter

må eg tenkje på dei som gjekk der

levde sine liv

åt frukost, åt middag, lo eller gråt

kyssa, elska, leika, sov

levde

der

Bror min sine hus er vitne,

tause songar

vi kan lese, tolke, sanse

ein stille tale til våre menneskelege tankar

Når alle mine ord på gulna papir

har forvitra, delt seg opp og er gløymde

står husa der endå