Under taka

kor mange tankar
har vel ikkje blitt tenkt
under desse taka

ja, tenk på tankane
og alle orda som er ytra
alle kyss som er blitt delte
og tida
ikkje minst tida som er delt
i fellesskap
eller er blitt tilbakelagt
sekund for sekund
i einsemd

det finst vel ingen tal
på alle gleder og sorger
som har stege opp som bøner
eller retningslause rop
gjennom desse taka,
alle draumane
som har snirkla seg ut av æva
og inn i tusen ulike hovud
på tusen ulike måtar

men frå utsida viser ingenting av dette,
sett utanfrå kan ein tru
             det heile dreiar seg om betongkonstruksjonar

Perleband

ein vind glir lett over fortauet

forbi jentene som hoppar paradis

inn porten til bakeriet

gjennom kleda til bakarsveinen

og ut på baksida, under ein bil

ruskar i håret til mekanikaren

svingar til venstre langs husrekka

over eit gjerde

forbi husmora og klesvasken

forbi snekkaren og den halvferdige veggen

forbi han som har sovna ved grillen

forbi ho som strekk seg for å nå

ein ball som sit fast i eit tre

(ruskar litt i treet, så ballen dett ned)

og vidare gjennom eit kjøpesenter

rundt alle dei travle fjesa, vidare

ut i vårsola, eit parkområde

over alle solslikkarane

inn i ein bygard, opp til øvste etasje

der den einsame mannen ser i album,

gjennom alle romma i huset hans

ut bakdøra

ned bakgatene

forbi dei to som vekslar pengar og dop

forbi han som søv i inngangspartiet

forbi dei to som kysser

forbi han som gret over knuste bitar

forbi skiltet med bynamnet på

og tek med seg lukta av alle desse

som eit perleband

vidare

inn i landet

Dokkemann - Bunden, fri

Eg heng i trådar
let ein annan styre mine rørsler
gå her, gå der
sitje ned, hoppe litt
og eg er glad
ja, glad til
for mine dagar er gode
og livet, om ikkje alltid eit show
så ofte nok

I andre enden er eg festa
til ein som ser meg,
ein som veit kva eg treng
har overblikk og ekspertise
og vil meg berre godt

Du seier eg bør slite meg laus,
ta av åket og finne min eigen veg?
Det er i trådane eg er fri, ser du

tek eg dei av
er det berre tyngdekrafta att
å gjere krav på meg

(Mitt bidrag til måndagstema hos Alt som er vakkert)