Lite til

Det skal ikkje mykje til:

- ein grasflekk, nokre kvadratmeter

tørt og handfast land,

ei stille vik,

eit tre, eller to

og kanskje ein fot eller så med jord

Det skal ikkje mykje til,

før eit menneske, ein eller annan gong

har funne det verdt

å busetje –

Husdiktet

Dette diktet er eit hus

eit digert, vakkert hus

eller, eit ganske lite

og koseleg

Eit du kan bu i

eller, ikkje eit heilt hus

eigentleg er det reisverket til huset

det som held det oppe

ikkje treverket eller betongen

men det som er mellom

veggane

alt som fyller tomrommet inni

For kva hadde vel eit hus vore,

utan tomrom mellom veggane?

Akkurat. Og det er dette diktet!