torsdag 31. juli 2014

I kvar hand



I venstre handa: Ein kniv
I høgre handa: Ei nål,
med svart sutur gjennom auget

Eg ser over ingenmannsland,
og veit ikkje kva hand eg skal strekkje
mot deg;
Ordren seier venstre,
hjartet seier høgre

Kvifor må det alltid vere
vi og dei?
Kvifor kan det ikkje heite – Oss?

tirsdag 29. juli 2014

Bajonettane



Sollyset glimtar i våpen
av nypussa stål
Tusen bajonettar, på rekke
Midt i mot – ei ny rekke
Tusen våpen, like blanke

Bak våpna, på begge sider
står gutar
i nyvaska, flotte uniformar
Solbrune fjes, på begge sider

Ansikta er bleike og bestemte
Auga er sikre, ryggane rake
Hendene skjelv

Men ikkje så mykje at det syns

Dei er klare og lyttar
Høyrer kampropet runge:
Fram gutar!
Hev våpen!

Spring av stad! Gjer di plikt!
For fedrelandet! For Gud!
For dine barn og din konge!

Eller 

Lytt til kviskringa
frå vinden
og to tusen bestemødre:
Stikk bajonetten i jorda
Gjer  det no!

Pløy kvar dykkar fure
Så korn og poteter
og vatne med tårene
frå to tusen mødre utan søner
Rop eit leve for jorda
Rop eit leve
i fred

mandag 28. juli 2014

På veg




Raspande, knirkande støvlar
over den hardtrampa jorda
i takt
som ein parade for dei døde
og dei snart døde,
som endå har varme, bankande hjarte
og fastfrosne tankar:

dei ligg att som krakelerte isroser
på barndomsdraumane,
dei små boblene på tidselva
i ferd med å bli knuste
mot krigens realitetar

Støvlane trampar vidare, i takt
på veg mot dei mektige si leikegrind

Dei eller oss,
vi går mot døden, no

er det berre takta som held oss oppe



#100 år

I dag er det hundre år sidan 1. verdskrigen starta, ved at Austerrike-Ungarn erklærte krig mot Serbia. Dermed begynte dominobrikkene å falle, ei etter ei, og snart var dei fleste store landa i Europa (og dermed også koloniane) involverte. 

Å lese om 1. verdskrigen og alle slaga som vart kjempa der er dyster lesing. Eg tenkjer på alle dei millionane av menneskeliv som gjekk tapt, og dei endå fleire millionane som vart traumatiserte og skada for livet. Krig er ei forferdeleg sløsing av dei ressursane vi er gitt, både materielle goder og menneskeliv.

For spesielt interesserte kom eg over ein fin bildeserie på msn i går. Dette er ein gjennomgang av dei aller viktigaste hendingane og slaga i 1. verdskrigen. Viss du meiner at du burde vite meir om den store krigen, er dette ein grei plass å starte!

 

lørdag 26. juli 2014

Det krigen gjer




den som bøyer seg ned
og luktar på blomar,
den som elskar lukta
av ein sommar på hell,
den varme dampen
frå fuktig mold – ein dag
der kroppen finn si motvekt
i mjuk mose
og latteren sit laust
- fordi ein er glad

den som elskar livet,
den som lengtar etter kjærleik
rettar blikket mot skyene
fjella
utover bølgjene
på det store, uendelege havet
og veit at der ute
ein dag
ventar dei store eventyra
og ein kan få vere ein del av dei
vere med
endre verda
fylle kroppen med pumpande
levande boblande blod

den som bøyer seg ned
og luktar på blomar,
den som endå ikkje
har fått innkallinga –
den som endå ikkje
har kjent smaken av krutt
rive i nasa,
den som endå ikkje
har sett døden vandre
med tunge sko
over våtmarkene –

den som endå kan
kjenne gleda ved
å leve –